Kanal di Panamá ta keda un tema delikado pa panameñonan, despues di menasa di Donald Trump ku Merka lo por disidí pa rekuperá e kanal.
CIUDAD DE PANAMA (AFP).- Ehérsito di Merka a realisá, huntu ku polis panameño, un seri di ehersisio pa protehá kanal di Panamá, meimei di un akuerdo polémiko ku supuestamente ta influensiá pa China.
Pa e insiso dje maniobranan ayera a yega Panamá tres helikòpter di ehérsito norteamerikano na e base aéreo di Servisio Nashonal di Panamá (Senan) den e distrito di Arraijan.
E aparatonan, dos UH-60 Black Hawk i un CH-47 Chinook, a baha djadumingu na e aeropuerto Panamá Pasífiko, kaminda ántes tabatin e base militar norteamerikano di Howard.
E ehersisio “ta pa prepará nos forsanan, komo tambe e paisnan di region, kontra di kualke menasa pa e seguridat i defensa di kanal di Panamá”, segun Michael Palasio kende ta sup komisionado di Senan.
“Ta un ehersisio bilateral ku e Komando Zùit di Merka”, Palacios a agregá.
Durante dje ehersisio lo realisá vários akshon di embarká i desembarká, reskate i komunikashon den vários zona dje pais.
Un luna pasá, sòldánan norteamerikano a realisá ehersisionan similar na Panamá pa protehá e kanal ku ta konektá dos osean, den kuadro di un akuerdo bilateral firmá den aprel.
E memorandum ei ta permití pa Merka usa basenan aéreo i naval panameño pa “training” durante di un periodo di tres aña, ku posibilidat di prolongashon.
E firmamentu a tuma lugá bou di preshon di Trump, kende a menasá na rekuperá e kanal bou dje argumento ku e ta bou di influensia di China. Pero e memorandum ei a provoká protestanan den e pais sentroamerikano.
Presensia militar di Merka ta un asuntu sensibel na Panamá, pues e ta laga tur hende kòrda riba e époka ku e pais norteamerikano tabatin un base militar den e pais promé ku a entregá e kanal na panameñonan riba 31 di desèmber di 1999.
Pero den último añanan ehérsito norteamerikano a tuma parti den vários ehersisio militar na Panamá huntu ku otro paisnan latinoamerikano.
SENAN un dia promé ku e maniobranan a duna di konosé ku e ehersisionan lo dura te ku djabièrnè benidero, pero ku durante dje ehersisio ta “respetá e soberania nashonal”.
INTERNASHONAL 1- KANAL
Kanal di Panamá ta keda un tema delikado pa panameñonan, despues di menasa di Donald Trump ku Merka lo por disidí pa rekuperá e kanal.
