CARACAS, AP.- E gobièrnu di Merka ta preparando e entrega di un karga di yudansa humanitario nobo na frontera entre Venezuela i Colombia, ounke pa promé biaha den avion militar. Aktualmente tin preshon fuerte pa presidente Nicolás Maduro renunsiá su poder komo mandatario di e pais.
E anunsio di yudansa adishonal a tuma lugá riba e mesun dia ku e atministrashon di Presidente Donald Trump a anunsiá sanshon kontra e presidente di PDVSA i otro funshonarionan klave di e área di Maduro su ekipo di inteligensia.
Outoridat merikano tin planiá di manda 250 tòn di kuminda, artíkulonan higiéniko i suplementonan nutrishonal na e siudat kolombiano Cucuta. Ya tin vários suministro wardá na e siudat kolombiano wardando pa wòrdu entregá na Venezuela.
Merka a disidí pa manda yudansa despues ku Opositor Juan Guaidó a manda pidi esaki. E gobièrnu di Trump i vários pais mas a rekonos’é komo e lider berdadero di Venezuela despues ku Maduro a huramentá pa un segundo mandato den un akto ku mayoria pais ta konsiderá komo ilegal.
Guaidó, kende ta presidente di Asamblea Nashonal kontrolá pa oposishon a primintí di entregá yudansa na e venezolanonan apesar di Maduro su rechaso.
