Panameñonan ku akshon di protesta relashoná ku bishita di Sekretario di Defensa di Merka na Ciudad de Panamá.
CIUDAD DE PANAMA (AFP).- Sekretario di Defensa di Merka, Pete Hegseth, a sigurá na Panamá ku e gobièrnu di Donald Trump “lo no permití” ku China ”ta pone den peliger” e operashon di kanal di Panamá.
“Awe kanal di Panamá ta enfrentá menasanan nobo, Merka lo no permití ku China komunista ni kualke otro pais lo pone den peliger e operashon i integridat dje kanal”, segun e hefe di Pentágono den un diskurso na un base naval ubiká na entrada dje kanal.
Apesar ku Merka den 1999 a entregá na Panamá e kanal ku Merka a konstruí den 1914, Trump e menasá pa tuma bèk su kontròl, sin deskartá usa di forsa, bou dje argumento ku e kanal ta kontrolá pa Beijing.
“Mi ke ta bon kla. China no a konstruí e kanal aki, ni a operá e kanal. China lo no arma e kanal. Huntu ku Panamá na kabes, nos lo mantené e seguridat dje kanal”, segun Hetseth, kende a reuní mas trempan ku e presidente José Raúl Mulino.
Segun e sekretario di defensa norteamerikano, t’asina ku “empresanan chines tin kontròl riba e infrastruktura krítiko den e zona dje kanal. “Esaki ta duna China e posibilidat di realisá e trabounan di vigilansia, i esei ta trese kuné ku Panamá i Merka ta ménos sigur”, segun el a agregá. Seguidamente el a bisa ku Panamá huntu ku Merka “lo rekuperá e influensia” ku Beijing tin.
Washington ta konsiderá komo un menasa pa seguridat nashonal i regional ku e empresa Hutchison Holdings, di Hong Kong, ta operá dos haf importante den ekstremonan dje kanal, kaminda un 5% di komersio marítimo mundial ta pasa.
