WASHINGTON, MERKA, AFP.- Merka a bisa djaweps ku Union Europeo kier negoshá ku e gobièrnu di Nicolás Maduro i ku esaki no ta un solushon pa Venezuela, insistiendo ku no por dialogá ningun “asesino, tirano i terorista”.
Carrie Filipetti, e sekretario athunto di ofisina di Asuntunan di Hemisferio di Departamento di Estado a bisa ku e komunidat internashonal no mester enfoká riba posponementu di elekshon legislativo den Venezuela, kual mester tuma lugá riba 6 di desèmber.
“Maduro mester renunsiá pa nos por logra organisá un elekshon liber i hustu”, asina el a bida durante un videokonferensia organisá pa e grupo di eksperto Atlantic Council.
“Un negosiashon ku e régimen di Maduro no ta e solushon”, asina el a agregá.
Venezuela ta pasando dor di un krísis polítiko profundo, kual a empeorá desde ku Maduro a gana un di dos mandato den yanüari 2019. E votamentu aki a keda kuestioná pa opositornan i e komunidat internashonal.
