SAN DIEGO, AP.- E sekretario di Hustisia Jeff Sessions a bisa djaluna ku su polítika di sero toleransia pa kualkier ku drenta e pais ilegalmente por provoká ku mayornan ta wòrdu separá di nan yunan.
Den deklarashonnan serka di e muraya na frontera ku ta separá San Diego di e siudat mehikano Tijuana, Sessions a bisa ku e Departamento di Seguridat Nashonal lo manda kada kaso di entrada ilegal na fiskalnan federal. E mayornan lo keda detené, miéntras ku nan yunan por wòrdu transferí pa Departamento di Salú i Servisio Humano.
Thomas Homan, direktor interino di Servisio di Kòntròl di Inmigrashon i Duana, a bisa algu similar: ku e polítika lo sòru pa mas akshon hudisial, kual ta inkluí separashon di algun mayor di nan yunan. El a ninga ku e gobièrnu di presidente Donald Trump tin un “polítika general” di separá famianan komo forma di desanimá otronan pa nan no purba drenta e pais ilegalmente.
