Un señora ta zuai ku bandera di Iran dilanti di un billboard anti-Merka, kual ta referi na e presidente merikano Donald Trump.
WASHINGTON (AFP).- Forsanan norteamerikano ta prepará pa reanudá nan operashon di guera kontra di Iran den kaso ku risibí instrukshon, segun e hefe di Estado Mayor, miéntras ku Pentagon e manda ku un kontesta “devastador” si Iran ataká barkunan komersial den e kanal di Ormuz. Merka i e repúblika islamita ta “fula pòls” pa kòntròl dje kanal stratégiko, via kua ta konta ku tránsito di un kinta parti di e komersio mundial di petrolio. For di inisio di e guera ku Merka i Israel a start dia 28 di febrüari, kousando míles di morto na prinsipalmente Iran i Líbano, Teheran a kontrolá e kanal di Ormuz. E menasanan di Washington a yega despues ku e prinsipal negoshadó iraní a bisa ku Teheran “ni sikiera”a kuminsá midi forsa ku Merka, despues di kantidat grandi atake den e via marítimo Ormuz.
E Guardiannan di Revolushon di Iran a primintí na duna un “reakshon kontundente” si kualke barku desviá dje ruta marká pa e repúblika islamita den e kanal. Washington na tur manera ta purba na preshoná Teheran i ta reklamá e pais aki pa bandoná su programa nuklear.
Dia 8 di aprel Merka a imponé un blokeo di hafnan iraní i djaluna último a lansa e operashon “Proyekto Libertat” ku a permití pa barkunan blòkiá pa algun siman kaba por a krusa e kanal. Segun vários empresa spesialisá, mas ku 900 barku tabata den e Golf na final di aprel, ku alrededor di 20.000 tripulante. “E Mando sentral di Merka i e sobrá dje forsa konhunto ta sigui prepará pa reanudá e hostilidatnan” kontra Iran si bini òrdu pa hasi esei”, segun e general Dan Caine.
Rubio: Ofensiva militar v/s Iran a kaba
Mientras tantu, ayera nochi ta surgi otro notisia for di Merka ora ku Sekretario di Estado Marco Rubio, deklará ku e ofensiva militar kontra di Iran a yega na su final. “E operashon a kaba, manera e presidente a informá Kongreso. Nos a konkluí e fase aki”, Rubio a bisa na periodistanan.
Gobièrnu di Trump tabatin 60 dia despues di a start e guera pa informá Kongreso riba esaki. Un guera ku Trump a start sin pèrmit di Kongreso. “E no ta un operashon ofensivo, sino unu defensivo”, segun Rubio. “Esei ta nifiká algu mas simpel: nos no ta tira a ménos ku nan no hasi esei promé”, segun el a yega di bisa.
