WASHINGTON, AP.- Un funshonario di Donald Trump a bisa djaweps ku e separashonnan di famianan migrante na frontera a baha desde ku a implementá Trump su polítika di sero toleransia aña pasa.
E sekretario interino di Seguridat Nashonal, Kevin McAleenan, a bisa ku ménos di 1.000 mucha a wòrdu separá for di nan famia, entre 450.000 gruponan familiar ku a krusa frontera for di òktober. El a agregá ku a separá nan pa motibu di salu i seguridat, entre otro motibunan.
“Gran mayoria” di e famianan ta uni, asina el a bisa.
E konteo no ta inkluí muchanan ku ta yega ku ruman grandi, tio òf un abuelo i ku ta keda sera bou di un lei na vigor for di basta tempu kaba i kual su ophetivo ta pa prevení trafikashon di sernan humano.
McAleenan a agregá ku Kongreso mester promové leinan pa permití ku agentenan na frontera ta usa mas kriterio pa e grupo aki por keda huntu.
McAleenan a deklará djaweps ku ta investigando e problemanan na frontera.
Aktualmente tin un indignashon kresiente pa e forma kon ta trata migrantenan na frontera, un investigashon interno kontra agentenan di patruya na Frontera ku a publiká komentarionan grosero i sarkástiko den un grupo sekreto riba Facebook i un proyekto di e siman aki pa pone fin na petishonnan di asilo na frontera ku México i Merka.
