HOUSTIN, AP.- E gobièrnu merikano a anunsiá djabièrnè ku lo amplia un medida ku ta obligá solisitantenan di asilo pa keda for di e pais i warda den un di e siudatnan mas peligroso di México, kaminda tin míles ta kampa, algu ya pa vários luna kaba.
Departamento di Seguridat Nashonal di Merka a bisa ku e lo apliká su “protokòlnan di protekshon di migrante” na Brownsville, Texas, na otro banda di frontera di Matamoros, México, kual a drenta na vigor djabièrnè.
Bou di e norma, e solisitantenan di asilo ta haña un òrdu pa presentá den korte riba un fecha determiná i ta bolbe México bek despues di esaki. E norma ta wòrdu apliká na San Diego, California, El Paso, Texas, entre otro siudatnan na frontera.
Merka kier redusí e gran fluho di migrantenan sentroamerikano ku ta krusa México pa pidi asilo. E kaminda mas transitá pa e krusamentu ilegal aki ta e zona yama Rio Grande Valley, na Texas. E norma no a keda apliká mesora pa otro siudatnan den e zona.
