Kubanonan ta selebrá un fiesta durante di un dje hopi blèkoutnan na La Habana.
WASHINGTON (AFP).- Departamento di Finansa norteamerikano a anunsiá ayera sanshonnan kontra di ministernan kubano, miembronan dje organisashon militar i di servisionan di inteligensia dje pais komo parti di su polítika di preshon riba e isla komunista. E sanshonnan ta impedí e funshonarionan i e organisashonnan pa nan tin kualke tipo di relashon ekonómiko ku un kontrapartido norteamerikano.
Someté na un embargo for di 1962, for di yanüari Cuba ta enfrentá un blokeo petrolero imponé pa e gobièrnu di Donald Trump, loke a sòru pa un krísis energétiko severo i masivo i oranan largu di blèkout na e isla.
Ayera Ofisina di Kontròl i Propiedatnan Estranhero a inkluí riba su lista sanshonnan kontra di ministernan di Energia, di Hustisia, di Komunikashon i e presidente di Asamblea Nashonal. Tambe a subi e lista e vise minister di Forsanan Armá, e hefenan di Ehérsito Oriental i Sentral, e hefe kontra inteligensia militar komo tambe Direkshon General di Inteligensia.
Na inisio di mei, Trump a aprobá un pakete nobo di sanshonnan kontra di La Habana. Washington ta insistí ku e isla ta representá un menasa pa su seguridat nashonal. Den e konteksto di tenshonnan bilateral, e direktor di CIA, John Ratcliffe, djaweps último a biaha pa La Habana pa un reunion eksepshonal ku funshonarionan kubano haltu.
E paisnan ta mantené kmbershonnan i Washington a ofresé 100 mion dòler na yudansa di urgensia pa e isla meimei di un krísis ekonómiko sumamente grave, pero solamente si e yudansa por keda distribuí pa iglesia katóliko.
