WASHINGTON, AP.- E gobièrnu di Donald Trump a pone mas sanshon kontra Iran, miéntras e sekretario di Estado, Mike Pompeo a denunsiá e influensia iraní kresiente durante un bishita na Líbano.
E Departamento di Finansa a bisa ku e sanshonnan a wòrdu apliká kontra 31 sientífiko, tékniko i empresanan ku ta partisipá den programanan di investigashon i desaroyo nuklear i di misil. Nan ta afiliá na Organisashon di Inovashon i Investigashon pa Defensa di Iran.
Dieskuater persona, inkluyendo e presidente di e organisashon i 17 operashon supsidiario a wòrdu afektá ku e sanshonnan.
E sanshonnan ta kongelá vienes di esnan den hurisdikshon di Merka i ta prohibí e siudadanonan merikano pa realisá transakshon ku nan.
E funshonarionan a bisa ku e menasa di sanshon lo limitá e kapasidat di esnan sanshoná pa sali di Iran, partisipá den konferenshanan di investigashon òf asta haña otro trabou.
Iran a komprometé na no reanudá tareanan relashoná ku fabrikashon di armanan atómiko konforme e akuerdo nuklear di aña 2015. E agensia atómiko di Nashon Uní a sertifiká e pais su kumplimentu, apesar ku Merka ta bisa ku Iran no a kumpli ku e akuerdo.
Merka a retirá di e akuerdo na aña 2018 i Trump a bolbe pone mas sanshon kontra e pais.
