Agentenan di ICE deteniendo un persona
WASHINGTON, MERKA, AFP.- E gobièrnu merikano a aprobá un regla pa aselerá tur trámite di demanda di asilo. Esaki por provoká deportashon di míles di solisitante di asilo.
Departamento di Seguridat nashonal (DHS) a splika ku e meta ta pa redusí e gran retraso den tèstnan ku solisitantenan di asilo mester enfrentá den e pais.
Bou di e regla nobo, e demandanan lo keda eksaminá direktamente pa huesnan di inmigrashon, ku ta dependé di Departamento di Hustisia, sin ku e solisitante a haña un entrevista ku funshonario di servisio di inmigrashon i siudadania (USCIS).
Normalmente e funshonario ta e promé kontakto ofisial pa e inmigrante ku buska refugio na Merka.
E regla nobo ta baha e tempu total ku ofisialnan di asilo i huesnan di inmigrashon mester di dje pa tuma un desishon riba solisitutnan di asilo.
E abogado general di DHS, James Percival, a bisa ku e reglanan nobo lo “mehorá efisiensia i kumpli” ku e promesa di Trump pa tuma medidanan kontra inmigrashon ilegal.
Trump a primintí durante su kampaña ku e lo ekspulsá miónes di migrantenan indokumenta. Desde ku el a yega na poder aña pasa, el a tuma un serie di medida destiná pa aselerá deportashonnan i redusí e kantidat di personanan ku ta krusa na frontera.
