WASHINGTON, MERKA, AFP.- Merka a ataká i destruí un supuesto boto ku droga (narcolancha), i a mata kuater persona na bordo, segun indikashon di Southern Command, enkargá ku e zona.
“Servisionan di inteligensia a konfirmá ku e boto tabata transitá riba un ruta konosí di narkotráfiko den Karibe i ku e tabata involukrá den operashonnan di narkotráfiko”, asina Southern Command a indiká den un mensahe riba X.
“Kuater narkoterorista a muri den e akshon akí”, asina e mensahe e añadí, kompañá pa un video pretu ku blanku ku ta mustra e lancha den laman, promé ku el a keda destruí.
E gobièrnu di Donald Trump a deklará vários kartel narkotráfiko komo organisashonnan terorista. Esaki ta duna e pais pèrmit pa ataka nan aunke nan no ta representá un peliger pa forsanan den Karibe i Pasífiko.
Organisashonnan di defensa di derecho sivil, i tambe institushonnan manera Komishon Interamerikano di derecho Humano, a kritiká e tipo di atakenan aki, konsiderando nan komo ilegal segun leinan internashonal.
