WASHINGTON (AFP).- Merka ayera a duna di konosé ku pa loke ta bai e aña aki nan a tumba mas ku 300 ‘drones’ ku ta relashoná ku krímen organisá. E insidentenan tuma lugá na frontera ku México. E Komando di Nort di ehérsito norteamerikano a relashoná e ‘drones’ na gruponan di droga, ounke sin señalá ningun grupo spesífiko. Tampoko a duna detaye si e tumbamentu di ‘drones’ a tuma lugá riba teritorio merikano òf méhikano.
E organisashonnan kriminal transnashonal ta usa ‘drones’ pa apoyá nan aktividatnan ilegal na frontera, inkluso operashon di kontrabanda i trabounan di vigilansia riba su personal”, segun e komando a bisa den un komunikado.
E sekretario mehikano di defensa a indiká ku ta trata di aparatonan komersial, usa pa detektá “rutanan ku ta liber, kaminda no tin presensia di outoridat”. “Solamente nan ta kapta imágennan i ta transmití esakinan”, segun e general Ricardo Trevilla den konferensia di prensa dje presidente Claudia Sheinbaum.
Sheinbaum a reforsá e operashonnan kontra di narkotráfiko bou di preshon di Donald Trump kende a menasa ku imponé sierto tipo di belasting riba México.
Trump tambe a ofresé apoyo militar na Sheinbaum pa bringa krímen organisá, pero e gobernante iskierdista a insistí ku kualke akshon militar merikano riba suela méhikano lo ta un violashon di soberania di su pais.
