ABU DABI, EMIRATO ARABE UNI, AP.- Merka a oumentá su krítikanan kontra e lider venezolano Nicolás Maduro ku e petishon pa forma un gobièrnu nobo den e pais.
Departamento di Estado a bisa den un komunikado ku ta sostené e lider di kongreso opositor di Venezuela, Juan Guaido, kende a indiká ku e ta prepará pa asumí e puesto di Presidente di Venezuela temporalmente pa buska reemplaso pa Maduro.
E komunikado ta e deskarga di atake mas resien kontra e gobièrnu di Maduro. Nicolás Maduro su inougurashon di segundo mandato a wòrdu konsiderá komo ilegal.
“E pueblo di Venezuela meresé biba den libertat, den un sosiedat demokrátiko goberná pa lei”, asina bosero di Departamento di Estado, Robert Palladino a bisa. “A yega ora pa un transishon pa un gobièrnu nobo. Nos ta sostené e petishon di Asamblea Nashonal pa tur venezolano traha huntu, pasifikamente, pa restourá un gobièrnu konstitushonal i krea un futuro mas briante”.
“E gobièrnu di Merka lo sigui usa tur su peso di ekonomia i diplomasia pa preshoná restourashon di demokrasia den Venezuela”.
Sekretario di Estado Mike Pompeo a papia ku Guaido na komienso di siman, despues ku e hòmber a wòrdu skohé pa fungi komo presidente di Asamblea Nashonal.
