Na diferente parti di Merka kasi diariamente tin protesta relashoná ku e guera ku Donald Trump ta hibando kontra di Iran. Awor su gobièrnu ta spera ku pais pais lo respald’é den e guera.
TEHERAN, Iran (AFP).- Merka ayera a eksigí pa tantu su aliadonan komo tambe China uni nan mes na e kampaña nobo di presidente Donald Trump pa aisla e ekonomia iraní ku a provoká “e kolapso di gobièrnu di Tehran”.
E deklarashonnan dje sekretario di finansa, Scott Bessent, a suprayá kon Trump ta poniendo preshon militar pa haña mas forsa kontra di Iran, miéntras ku su guera inpopular ku ya ta kumpli kasi seis luna.
“E kos aki ta bai funshoná kontra di Iran i lo e pone ku e régimen ta kai”, segun Bessent a bisa na televishon. “Lo e bira e operashon di mas grandi na nivel mundial pa loke ta un aislamentu ekonómiko “.
Konsultá riba su aliadonan, Bessent a lansa un atvertensia: “Sea nan ta huntu ku nos òf kontr’e nos”.
Riba e pregunta si Merka lo pone preshon riba China, el a bisa ku “tin hopi kòmbersashon di kua ta mihó pa tene nan privá”, pero el a hasi yamada na Beijing pa “uni su mes na e plan”.
E plan aki kontra di Iran ta nifiká ku ta ménos probabel ku Merka lo por bolbe realisá operashonnan militar grandi kontra dje pais, segun Besset a splika . “Si nos ta poniendo e máksimo preshon ekonómiko, esei a nifiká ku probablemente lo no tin akshon di guera na gran eskala”, segun el a deklará.
Trump djárason a anunsiá un mensahe ekstenso riba Truth Social bisando ku “e operashon ekonómiko kontra di Iran lo ta aplastante i ku kualke pais ku permití pa su institushonnan finansiero, empresanan, aeropuertonan òf entidatnan gubernamental duna kualke tipo di salbabida na Iran lo tin ku soportá konsekuensianan ekonómiko severo”.
Di su parti, Iran a akusá Merka di “terorismo ekonomiko” i di “krímennan kontra di humanidat”.
