WASHINGTON, MERKA, AFP.- Tu biahero ku yega Merka den avion mester presentá un tèst negativo di COVID-19, realisá dentro di 72 ora promé ku buelo, kuminsando 26 di yanüari, segun indikashon di Sentro di Kontrol i Prevenshon di Enfermedat (CDC) den e pais.
“E tèst no ta eliminá riesgonan, pero si kombiná esaki ku un periodo di karentena i prekoushon kotidiano manera uso di masker i distansia sosial, por hasi biahenan mas safe”, segun indikashon di e direktor di CDC, Robert Redfield.
CDC ta rekomendá pa tur biahero bolbe tèst entre tres i sinku dia despues di yega i keda sera durante por lo ménos un siman.
E desishon ta ekstendé un norma ku e pais a adoptá despues di aparishon di e variante britániko ku ta muchu mas kontagioso. Epidemiologonan a atvertí ku ta probabel ku e variantenan nobo ya a drenta Merka kaminda mas di 379.000 persona a muri komo kousa di COVID-19.
E otro variantenan di COVID a keda reportá den Suráfrika i Brasil. Hapon e bisa djamars ku e pais ta trahando pa aisla i analisá un variante deskubrí den kuater pasahero ku a yega for di Brasil.
