E formashon musikal mehikano Los Alegres del Barranco di kua e integrantenan no por drenta Merka mas. Gobièrnu mehikano tambe a start un investigashon riba e grupo.
WASHINGTON (AFP).- Gobièrnu di Merka a revoká e visanan di miembronan dje grupo musikal mehikano Los Alegres del Barranco pa motibu di kansion i imágen ku ta “glorifiká e lider di Cártel Jalisco Nueva Generación (CJNG), segun Departamento di Estado a informá.
Los Alegres del Barranco den vários di su konsiertonan a pone atenshon na potrètnan di Nemesio Rubén Oseguera, alias “El Mencho”. Nan a hasi esei entre otro den un konosido ouditorio di e siudat di Guadalajara, den e estado di Jalisko, kaminda na komienso di mart a deskubrí un aparentemente sentro di ‘training’ di krímen organisá.
Trump ta den pleno akshon kontra di migrashon ilegal i narkotráfiko, miéntras ku CJNG ta un dje ocho gruponan kriminal designá pa Washington komo organisashonnan “terorista”.
“Mi ta kere firmemente den libertat di ekspreshon, pero esei no ta nifiká ku ekspreshon mester keda liber di konsekuensianan”, segun Christopher Landau, sup sekretario di estado.
“Merka a revoká visanan di trabou i turismo na integrantenan dje grupo Los Alegres del Barranco, pa a difundí imágennan ku ta glorifiká e narko El Mencho”, segun el a trese dilanti. “Nos lo no habri tapeit kòrá pa esnan ku ta alsa kriminalnan i teroristanan”, segun Landau, huntu ku un video di un konsierto den kua por mira potrèt di El Mencho.
Na México e proyekshon dje imágen a generá krítika di outoridatnan lokal i federal. E presidente mehikano, Claudia Sheinbaum, djaluna a pidi pa start un investigashon relashoná kue suseso.
