NEW YORK, AP.- Merka a atvertí djadumingu ku e ta konsiderá pa sera embahada na Cuba despues di un serie di insidente ineksplikabel ku a daña salú di e diplomátikonan merikano. “Nos ta evaluando esaki”, asina e sekretario di Estado Rex Tillerson a afirmá.
E komentarionan ta e indikashon mas sólido te ainda ku Merka ta kontemplá kual por daña e renobashon históriko di relashon entre e dos paisnan. E embahadanan a habri na aña 2015 despues di mei siglo di hostilidat.
Den deklarashonnan na e programa “Face The Nation di e kadena CBS, Tillerson a bisa ku “esaki ta un tema grave den sentido di e daño di salú ku sierto individual a sufri. Nos mester a trese un parti di e grupo aki kas”.
Di e 21 víktimanan konfirmá, algun di pèrdida di oido króniko òf konmoshon serebral. Algun tin difikultat pa konsentrá òf kòrda kosnan kresiente entre otro.
Algun di e víktimanan a sinti un vibrashon òf skucha zonidonan ku misteriosamente por a wòrdu tende den sierto kamber so. Investigadornan ta pensa ku posiblemente ta trata di “atakenan soniko”. Otro víktimanan no a skucha nada, pero despues nan a desaroyá síntomanan.
Tillerson tabata yama esakinan “atake kontra salú”, pero Departamento di Estado ta preferá yama nan “insidente”. Nan no a determiná e kousa ni esnan kulpabel. Cuba ta ninga di tabata responsabel i a enfatisá ku e pais ta dispuesto na yuda ku e investigashon.
