WASHINGTON (AFP).- Gobièrnu di Merka a kumpra un flota di avionnan Boeing pa realisá su kampaña di deportashon segun òrdu di presidente Donald Trump, segun un alto funshonario di Departamento di Seguridat Nashonal. For di momento di su regreso na White House den yanüari, Trump a konbertí e lucha kontra inmigrashon ilegal den un di su prioridatnan den su di dos mandato.
“E avionnan ei ta permití ku ICE (Servisio di Inmigrashon i Kontrol di Duana) por operá ku mas efikasia, entre otro danki na usa di rutanan di buelo di forma mas efisiente”, segun Tricia McLaughlin, supsekretario di Seguridat Nashonal. ”E inisiativa ei ta spar e pagadónan di belasting norteamerikano e suma di 279 mion dollar”, el a agregá relashoná ku e kompra, segun The Washington Post.
Kontaktá pa AFP, Boeing a nenga na duna komentario. E pòst a informá ku e akuerdo a kontemplá e atkisishon di seis modelo di Boeing 737 pa 140 mion dollar ku un empresa yamá Daedalus Aviation, kreá na kuminsamentu di 2024, i lo kumpra dirèkt serka e kompania ku ta traha e avionnan.
Segun Human Rights First, for di despues ku Trump a regresá den funshon a realisá mas ku 1.700 buelo di deportashon. E razianan kontra di migrantenan ta na enkargo di agentenan ku kara tapá, método ku a provoká hopi krítika i akshonnan hudisial. Gobièrnu di Trump ta bisa ku mas ku 2 mion inmigrante indokumentá a bandoná e pais for di yanüari, di kua 1.6 mion di forma boluntario i e otronan deportá.
