WASHINGTON, AP.- Merka lo manda 1.500 sòldat medio Oriente meimei di tenshon intenso ku Iran, segun anunsio di presidente Donald Trump djabièrnè.
E mishon di e kontingente “lo ta básikamente defensivo” segun e mandatario a informá na periodistanan na Kas Blanku.
Kas Blanku a informá Kongreso tokante e desishon.
Promé ku Trump a dirigí palabra, funshonarionan di su gobièrnu a bisa ku miembronan di Kongreso a wòrdu notifiká ku lo manda e trupanan despues di un reunion na Kas Blanku pa analisá e proposishon di Pentágono pa fortalesé e presensia militar merikano den Medio oriente.
E siman aki, vários funshonario a bisa ku e planifikadónan di Pentágono a presentá un plan pa manda un máksimo di 10.000 sòldat den e region. E sekretario interino di Defensa Patrick Shanahan no a spesifiká e sifra anteriormente.
Merka a kuminsá reforsá su presensia den Golfo Pérsiko komo konsekuensia di un supuesto menasa di Iran.
Merka tin míles di sòldat den Medio Oriente, inkluyendo un base marina enorme na Bahrein i un base di Forsa Aéreo i Sentro di Operashon na Qatar. Tin 5.200 sòldat na Irak i 2.000 na Siria.
Merka a manda míles di militar mas den Golfo Pérsiko algun dia pasá, inkluyendo avionnan di karga i guera i barkunan di guera.
