WASHINGTON, MERKA, AFP.- E gobièrnu merikano lo no tin intenshon di kita Cuba for di e lista di paisnan ku ta patrosiná terorismo, asina e sekretario di Estado, Antony Blinken a bisa den Kongreso djaweps.
“Nos no tin intenshon di kita nan for di riba e lista”, asina Blinken a kontestá riba pregunta di e kongresista kubano Maria Elvira Salazar dilanti di komité di Relashon di Eksterior di Kámara di Representante.
E hefe di diplomasia di e gobièrnu di Joe Biden a bisa ku segun lei, e kriterionan pa retirá e status ta hopi haltu.
Na aña 2022 Washington i La Habana a kontinuá ku negosiashonnan riba e tema di migrashon, i e aña aki e embahada merikano na La Habana a sigui ku entrega di visa pa kubanonan ku ke biba na Merka.
Sinembargo, un normalisashon di relashon ku e isla komunista no ta riba Biden su agènda, spesialmente despues di e represhon di protestanan den yüli 2021.
