BERLIN, AP.- Ehérsito merikano a oumentá presensia di desena di helikòpter Chinook, Apache i Black Hawk na un haf na nort di Alemania pa wòrdu trasladá pa un base na Baviera.
Nobentikuater helikòpter i vários trùk di Brigada di Aviashon di Kombate, ku sede na Fort Drum, New York, a wòrdu traslada pa e haf Bremerhaven, segun informashon di agensia di notisia aleman DPA.
Gran parti di ekipo ta wòrdu desplasá pa base ehérsito Ilseheim, pero segun DPA, un otro parti ta wòrdu desplasá pa Lituania i Rumania.
Esaki ta un operashon di Operation Atlantic Resolve, ku ta kontemplá presensia konstante di un brigada di kombate merikano den Europa.
E mishon su intenshon ta pa kalma temor na Polonia i otro miembronan di NATO mirando e aktitut resien i hostil di Rusia.
