Merka ta outorisá buelonan dirèkt pa Venezuela

WASHINGTON (AFP).- Gobièrnu di Merka a outorisá un filial di American Airlines pa operá buelonan dirèkt pa e siudatnan venezolano di Caracas i Maracaibo for di Miami, dos luna despues ku un operashon norteamerikano a deroká e presidente Nicolas Maduro. E filial, Envoy Air, por operá buelonan pa un periodo di 2 aña, despues di a solisitá e pèrmit dia 13 di febrüari.
American Airlines a suspendé su servisionan pa Venezuela den 2019, despues di a bula pa e pais durante mas ku 30 aña. Envoy Air lo realisá buelonan diario pa tur dos siudat venezolano for di Miami, segun e kompania a anunsiá.
American Airlines den luna di kanari último a anunsiá di lo solisitá reanudashon di buelonan direkto pa Venezuela, djis despues dje operashon norteamerikano durante kua a detené e presidente venezolano Maduro.
“Reanudando buelonan pa Venezuela, American lo ofresé su klientenan e oportunidat pa reuní bèk ku nan famianan i generá negoshinan nobo i interkambionan komersial ku Merka”, segun Nat Pieper, direktor komersial dje kompania.
E relashonnan entre Merka i Venezuela a deteriorá progresivamente bou dje gobièrnu di Maduro, marká pa un represhon outoritario i un fuerte oposishon na e polítika internashonal di Washington. E pais tabata bou di sanshonnan severo norteamerikano tantu durante e mandato di Trump komo esun di su predesesor Joe Biden, pero algun restrikshon -sigur e relashon ku komèrsio petrolero – a kuminsá suavisá despues dje operashon norteamerikano ku kaptura di Maduro.