CARACAS, Venezuela (AFP).- Presidente di Venezuela, Nicolas Maduro, ayera a risibí na Caracas un representante di  presidente di Merka, Donald Trump, ku deportashon masivo riba agènda, meimei di un krísis polítiko pa e kuestionamentu di parti di Washington riba e re-elekshon di Maduro.

Televishon estatal a transmití imágennan dje enkuentro privá entre Maduro i e enviado Richard Grenell den Palasio Presidensial Miraflores. Pa e momentu aki no tin deklarashon.

Un funshonario haltu di White House a adelantá ku Grenell lo eksigí  di Maduro pa aseptá e kondishonnan pa manda bèk “kriminalnan i gèngnan venezolano” i a atvertí ku den kaso kontrario, “lo tin konsekuensia”.

E temibel ‘Tren de Aragua” ta operá den Merka i Trump, den su regreso na poder, a firma un dekreto ku ta deklará e grupo komo organisashon terorista.

“Presidente Trump ta spera ku Nicolas Maduro lo yama bèk tur e kriminalnan i miembronan di gèngnan venezolano ku a keda eksportá pa Merka, i ku e ta hasi esei dirèkt i sin kondishon”, segun e representante spesial di Merka na Amérika Latina, Mauricio Claver-Carone, den un konferensia di prensa.

“Si esei no ta e kaso, lo tin konsekuensia pasobra no ta un negosiashon a kambio di algu “, segun el a ekspresá.

Grenell tin programá pa papia ku Maduro riba kaso di norteamerikanonan prezu den prizònnan venezolano. “Nan mester keda liberá di forma inmediato”, segun Claver-Carone refiriendo na detenshonnan ku nan ta konsiderá komo rehennan”.

Ocho siudadano di Merka, entre nan un militar, i dos siudadano di otro nashonalidatnan ku residensia den e pais ei ta den prizòn na Venezuela, segun datonan di e organisashon di derechinan humano Foro Penal, dediká na defensa di prezunan polítiko.

Gobièrnu di Trump ta konsiderá komo kriminal kualke migrante ku a drenta Merka di forma ilegal.

LAGA UN KOMENTARIO

Please enter your comment!
Please enter your name here