Delcy Rodriguez i Diosdado Cabello, e ultimo aki e hòmber di konfiansa di èks-presidente Nicolas Maduro, ta funshonando segun desishonnan tumá na Merka.
CARACAS (AFP).- Merka ayera a publiká imágennan di kuater di su avionnan di guera durante un buelo resien dilanti kostanan di Venezuela, poko mas ku dos luna despues di nan atake militar ku a kondusí na kaptura di Nicolas Maduro. E Komando Zuit, ku presensia den Amérika Latina i Karibe, a mustra e imágennan di dos avion F-35, un avion di patruya P-B Poseidon i un KC-46 pa reabastesé ku fuel.
“Huntu nan a realisá un patruya aéreo dilanti kostanan di Venezuela. “Nos presensia persistente ta un testimonio di nos kompromiso ku nos sosionan den e region. Nos t’ei semper vigilando”, segun e general Francis Donovan, hefe dje unidat militar aki.
No a informá dje frekuensia di e tipo di maniobranan aki. Riba un dje potrètnan por opservá e formashon di avionnan dilanti kosta dje estado di La Guaira, sede dje prinsipal aeropuerto dje pais ku ta sirbi e kapital.
Donovan den febrüari último a reuní na Caracas ku e presidente interino Delcy Rodriguez i esaki su Minister di Defensa, Vladimir Padrino Lopez, i e Minister di Interior, Diosdado Cabello, kendenan durante di añanan a pronunsiá diskursonan “anti imperialista”.
Rodriguez a sinta komo presidente despues di kaptura di Maduro i for d e momento ei e ta goberná bou preshon di Washington. El a entregá e kontròl di petrolio na Merka i awor tin ku atendé ku un lei di mineria ku tambe ta na interes di Merka.
For di ougùstùs di 2025 Merka ta konta ku un flota poderoso di avion i barku di guera den Karibe, ku ta e presensia militar ku a finalisá ku kaptura di Maduro. Den e dianan promé ku esei, Venezuela tabata denunsiá e presensia di avionnan norteamerikano serka di su espasio aéreo.
