WASHINGTON ( AP).- Pakistan a bolbe habri e rutanan di suministro di OTAN pa e bisiña Afganistan despues ku Merka a pidi diskulpa na e gobièrnu di Islamabad pa morto na novèmber di 24 sòldá pakistani durante un atake aéreo di e aliansa militar oksidental, asina e gobièrnu merikano a informá ayera.
E insidente a daña e relashonnan bi lateral gravemente, ku ya tabata tenso, i a obligá Merka i su aliadonan na manda suministro pa Afganistan atraves di rutanan na nort di Pakistan, ku ta mas karu.
Debí ku a sera e rutanan na Pakistan, Merka mester a usa otro kamindanan via Rusia i Asia Sentral, ku a hasi e suministro mas karu. Den un kombersashon na telefon ku su kolega pakistani Hina Rabbani Khar, e sekretaria di Estado Hillary Rodham Clinton, a bisa ku Merka ‘ta lamentá e pèrdidanan ku e forsanan armá pakistani a sufri’, segun un komunikado.
Ambos parti a rekonosé di a kometé erornan ku a kondusí den e mortonan, asina Clinton a bisa.
Clinton a bisa ku Khar a inform’é ku e rutanan di suministro entre Pakistan i Afganistan a wòrdu habrí atrobe i ku Islamabad lo no kambia ningun gastu di tránsito, un tema inkluí den un negos iashon anterior.
Tabata e promé bes ku un funshonario di Merka ta pidi diskulpa formalmente pa e mortonan, un desishon masha debatí denter di e gobièrnu di presidente Barack Obama i ku Pakistan a eksigí durante e shete lunanan ku el a mantené e rutanan di suministro será.
Te ainda, Merka a insistí ku e tabata un aksidente i el a nenga di pidi diskulpa.
E anunsio a tuma lugá miéntras e prinsipal lidernan pakistani, sivilnan i militarnan, tabata reuní ayera na Islamabad pa analisá e reapertura di rutanan di suministro.
E seramentu di e rutanan a menasá tambe e koperashon regional nesesario pa negoshá e fin di e guera den e bisiña Afganistan. E reapertura di e rutanan di suministro lo por a redusí e tenshon entre ámbos pais hopi.
