Presidente mehikano, Claudia Sheinbaum, kende konstantemente ta sinti e preshon di parti di Merka ku ta akusá vários polítiko dje pais di ta metí den korupshon.
CIUDAD DE MEXICO (AFP).- Ayera Méhiko a informá di a detené un alkalde den funshon i otro sinku polítikonan lokal bou di sospecho di ekstorshon i tráfiko di arma. Esaki na momento ku tin akusashon di parti di Merka kontra di un gobernador ku nan ta tilda di ta metí den trafikashon di droga.
E presidente mehikano, Claudia Sheinbaum, a insistí ku su gobièrnu lo no tapa nada pa polítikonan delinkuente òf korupto. Den 2024 el a lansa e asina yamá “Operación Enjambre” pa detené funshonarionan lokal ku tin relashon ku organisashonnan kriminal.
Aunke ku e mandatario no ta defendé di forma direkto e gobernador Ruben Rocha pa e akusashonnan di parti di New York, el a pidi prueba di parti di Merka pa por aktua kontra e miembro di su partido. E sekretario di seguridat, Omar Garcia Harfuch, a bisa den konferensia di prensa ku entre e detenidonan tin alkalde dje poblashon di Atlalahucan i e èks alkalde di Yecapixtila, den e estado di Morelos.
Mas aleu a arestá otro kuater funshonario di e lokalidat di Cuautla, di kua e alkalde a hui i ta for di alkanse di hustisia. Tur ta keda akusá di “ekstorshon, delito kontra di salú, trafikashon di arma i delinkuensia organisá, segun Garcia Harfuch. E “Operacion Enjambre” ta konta ku 70 trahadó públiko detené for di 2024, segun sifranan ofisial.
