WASHINGTON, AFP.- Merka a anunsiá ku e ta prepará sanshonnan nobo kontra Bielorrusia den kordinashon ku Union Oropeo pa denunsiá e eksplotashon inhumano di fluho di imigrantenan.
“Nos lo sigui pidi kuenta”, na gobièrnu di presidente Alexander Lukashenko pa su atakenan persistente kontra demokrasia, derechinan humano i e normanan internashonal”, asina e bosero di diplomasia merikano Ned Price a bisa.
Bielorrusia ta akusá di a orkestá e fluho di migrantenan na su frontera ku Polonia, den vengansa pa sanshonnan oksidental ku a pone riba dje despues di e represhon di oposishon den e pais aki, despues di elekshon polémika konsiderá komo froudulento.
Entre 2 pa 3 mil persona, ku frekuensia di orígen kurdista irakí inkluyendo muhé i mucha, ta kamper pa vários dia den friu na frontera entre e dos paisnan di Oropa aki.
Union Oropeo a anunsiá djaluna ku nan ta prepará sanshonnan nobo kontra di e régimen Bielorruso ku lo afektá un kantidat signifikante di persona i entidat, asina e responsabel di relashonnan eksterior di e bloke Josep Borrell a bisa. Alexander Lukashenko a bisa ku e lo defendé su mes di Union Oropeo tuma medidanan di represaya.
E preshon riba Bielorrusia i Rusia ku ta su aliado a oumentá, ku kombersashonnan entre presidente franses Emmanuel Macron i su homólogo ruso Vladimir Putin, meskos ku e kansier aleman Angela Merkel i presidente bielorruso Alexander Lukashenko.
