PORT-AU-PRINCE, HAITI.- Merka ayera a prohibí buelonan sivil for di e pais pa Haiti i esaki pa un periodo di 30 dia, algun ora despues ku tres avion komersial a risibí tirunan na Port-Au-Prince.
E insidentenan ta asentuá e káos ku ta reina den e pais karibense, devastá pa violensia di gèngnan i ketu bai den un insertidumbre polítiko ku nombramentu di su di dos promé minister den sinku luna di tempu.
E reguladó aéreo norteamerikano a tuma e desishon ei despues ku un avion di Spirit Airlines a risibí tirunan ora ku e tabata baha na e aeropuerto internashonal dje kapital haitiano.
Un miembro di tripulashon a sufri heridanan menor despues dje tiroteo ku a laga vários impakto di bala den kabina dje avion, segun imágennan riba retnan sosial.
Otro dos avion ku tabata bandoná Port-Au-Prince djaluna, tambe a keda alkansá pa balanan, segun e kompanianan afektá, JetBlue i American Airlines. Tur dos kompania a komprobá e dañonan ku un revishon ora ku nan a baha na Merka.
E konseho presidensial di transishon haitiano a kondená e disparonan komo tambe e atakenan kontra dje poblashon sivil den último 48 oranan.
“E krímen odioso aki, ku ta menasá soberania i seguridat di Haiti, ta un intento pa aisla nos pais for dje senario internashonal”, segun e organisashon a lamentá den un komunikado den kua ta anunsiá ku a pone forsanan militar i polis na e aeropuerto prinsipal dje pais.
