WASHINGTON, USA (AFP).- E diplomátiko mas haltu norteamerikano pa Medio Oriente, Barbara Leaf, ayera a saludá e “mensahenan positivo” dje lider nobo den Siria, Ahmed al Sharaa, kende a primintí di lucha kontra di terorismo.
‘“Despues di nos kòmbersashonnan, m’a anunsi’é ku nos lo retirá e ofresementu di rekompensa ku durante di último añanan nos tabatin vigente” pa informashon riba su paradero, segun Leaf a bisa na prensa despues di a reuní ku Al Sharaa.
“Nos lo buska pa avansá riba e prinsipionan i akshonnan, no solamente ku palabra”, e diplomátiko a agregá, formando parti dje promé delegashon ofisial di diplomátikonan norteamerikano pa bishitá Damasco for di inisio dje brutal guera sivil.
“Nos ta respaldá plenamente un proseso polítiko ku liderazgo sirio i propio di sirionan ku ta resultá den un gobièrnu ku ta respetá derechi di tur sirio, inkluyendo e hende muhé i e diferente komunidatnan étniko i religioso”.
Leaf mas aleu a bisa ku lo no tin mas e influensia di Iran den Siria. Iran durante di hopi aña tabata aliado dje eks-mandatario Bashar al Assad, derotá algun siman pasá.
