…Den fin di siman Merka a manda pa El Salvador 238 prezu ku awor ta será na e pais sentroamerikano. Na nan yegada a pela tur kabes limpi i a uniformá nan…
SAN SALVADOR (AFP).- El Salvador ayera a tuma den su prizòn di máksimo seguridat un kantidat di 238 supuesto miembro dje banda kriminal Tren de Aragua i 23 dje gèng Mara Salvatrucha, tur saká for di Merka. E presidente norteamerikano Donald Trump, a hasi uzo di un lei di tempunan di guera pa ekspulsá e kriminalnan.
Ta trata di Lei di Enemigunan Estranhero di 1798, usá pa último biaha durante e Segunda Guera Mundial, pa emití e órden di ekspulshon. Pero djasabra un hues federal a para esaki, aparentemente na momento ku e e proseso di traslado pa el Salvador ya tabata tumando lugá.
E presidente salvadoreño Bukele a publiká un vidio riba kua ta mira e traslado dje detenidonan pa Centro de Confinamiento del Terrorismo (Cecot), na Tecoluca, 75 km zùitost di San Salvador, kaminda nan lo keda “pa periodo di un aña”, ku posibilidat pa hasi esei mas largu.
Bukele a ofresé pa sera e “kriminalnan peligroso”, tratando aki di personanan deklará pa Trump komo “enemigunan estranhero”.
Tres avion ku e prezunan a baha na e aeropuerto internashonal di El Salvador. Riba vidio publiká pa gobièrnu salvadoreño por a mira militarnan ta baha ku e prezunan kendenan na e momentu ei tabata na kadena.
Bukele a bisa ku “Merka lo paga un tarifa ku ta hopi abou pa nan, pero haltu” pa El Salvador.
Di su parti, Trump riba Truth Social a gradisí Bukele i a bisa “esaki ta e mònsternan ku e korupto (eks-presidente) Biden i e demokratnan di iskierda radikal a laga drenta den nos pais”.
E prizòn Cecot a keda inougurá tres aña pasá i ta konsiderá esun mas grandi di Amérika Latina, ku espasio pa 40.000 prezu. Te ku siman pasá tabatin15.000 prezu den e prizòn.
