WASHINGTON (AFP).- Merka a disidí pa stashoná dies avion F-35 na Pto. Rico komo parti di su ofensiva antidroga den Karibe, oumentando e tenshon ku Venezuela. E buelo pa Pto. Rico dje avionnan F-35 a tuma lugá apénas algun ora despues ku un avion di guera venezolano a bula pasa riba un barku di guera di Merka den Karibe.
E forsanan norteamerikano dilanti kostanan venezolano djamars último a lansa un misil riba un ‘speedboat’ ku supuestamente tabata transportá droga. Den e atake, sin presidente den e region, 11 “narkoterorista” a muri, segun palabranan di Donald Trump.
E atake ei a tuma lugá “sin fórmula di huisio” segun krítika dje minister di Interior venezolano, Diosdado Cabello. Promé ku esei, e minister di komunikashon, Freddy Ñáñez, a insinuá riba Telegram ku e imágennan dje atake tabata “un video ku inteligensia artifisial”.
Di su parti, e presidente kolombiano, Gustavo Petro, a bisa ku “e kolaborashon di gobièrnu kolombiano den e lucha kontra di droga ta profundo, pero nos ta tene kuenta ku leinan internashonal”.
Pentagon a atvertí Caracas despues di e buelo riba su barku di guera “pa no sigui ku ningun esfuerso adishonal pa stroba òf interferí den e operashonnan kontra di narkotráfiko i kontra di terorismo”.
Merka durante di dékadanan a hasi uso di operashonnan polisial di rutina en bes di usa forsa di guera pa konfiská droga den Karibe. E oumento dje tenshon e koinsidí ku un gira dje sekretario di estado norteamerikano Marco Rubio pa México i Ecuador, kaminda el a firma aliansanan nobo pa reforsá e lucha kontra di krímen organisá i migrashon ilegal i a atvertí ku su gobièrnu lo no dal stap patras.
“E gobièrnunan aliado di Washington den e region “lo yuda nos pa haña e personanan akí i lo rementá nan si ta nesesario”, segun Rubio a bisa den un konferensia di prensa huntu ku e kansiyer ekuatoriano Gabriele Somerfeld.
