WASHINGTON, MERKA, AFP.- Merka a anunsiá djamars ku lo suavisá e medidanan pa studiantenan internashonal regresá, pèrmitiendo siudadanonan di China, Brasil i otro paisnan pa drenta i kuminsá nan aña eskolar nobo na universidat.

Universidatnan a hasi vários petishon pa habri frontera pa studiantenan internashonal, pa motibu ku ta dependé finansieramente di studiantenan estranhero, partikularmente di China.

E sekretario di Estado, Antony Blinken a bisa ku studiantenan di China, Iran, Brasil i Suráfrika ku visa bálido ta bin na remarke pa drenta Merka, despues ku a prohibí entrada den e pais aña pasá.

E gobièrnu di Joe Biden ya a kita tur restrikshon pa studiantenan di Union Europeo i Reino Uní. Tur biahero mester presentá un tèst negativo di COVID pa drenta Merka.

Brasil tabata e di nuebe fuente di studiantenan internashonal mas grandi na Merka durante aña eskolar 2019-2020 ku 16.671, e kantidat mas haltu kompará ku otro nashonnan latinoamerikano segun sifranan ofisial.

Mas di un mion studiante internashonal ta studia na Merka tur aña. Datonan di Departamento di Komersio ta indiká ku e grupo aki a kontribuí ku 45.000 mion dòler na e ekonomia di Merka na aña 2018.

 

LAGA UN KOMENTARIO

Please enter your comment!
Please enter your name here