Vise presidente merikano JD Vance
BURGENSTOCK, SUISA, AFP.- Ayera Merka a suspendé e sanshonnan di Petroli temporalmente pa Iran. Esaki a sosodé despues ku visepresidente, JD Vance, a bisa ku Iran ta permití regreso di inspektornan nuklear di Nashonnan Uní, despues di kòmbersashonnan ku Suisa.
Siman pasá Tehran i Washington a firma un akuerdo pa prepará pa e negosiashonnan ku lo sigui den futuro, despues di kasi 40 dia di guera i un tregua frágil.
“Nos a krea un bon base pa logra un akuerdo final eksitoso”, asina Vance a bisa na periodistanan na e ‘resort’ di luho Burgenstock, na Suisa. El a agregá ku “e akuerdo final ta e kas. Ainda nos no a konstruí e kas, pero sí e fundeshi pa yega na un bon resultado pa e pueblo merikano”.
Departamento di Finansa di Merka a anunsiá ku lo kita e sanshonnan temporalmente pa permití ku Iran ta produsí, bende i entrega petroli i produktonan relashoná ku esaki te dia 21 di ougùstùs.
E negosiashonnan den futuro pa resolvé algun problema mas difísil entre Merka i Iran, inkluyendo e programa nuklear iraní.
Komo parti di e akuerdo, lo kita algun sanshon di Merka i e pais lo haña akseso bèk na parti di su aktivonan ku a vris.
Vance a deskribí e akuerdo komo “un akuerdo klásiko di Trump”, kaminda lo usa e plaka di Iran pa enrikesé agrikultornan merikano i alimentá e pueblo iraní.
