SAN DIEGO, AP.- E gobièrnu di Donald Trup a anunsiá djamars ku lo suspendé tur lei federal di kontratashon pa por aselerá konstrukshon di e muraya na frontera ku México.
E Departamento di Seguridat Nashonal a bisa ku e suspenshon di e normanan pa kumpra material lo permití pa aselerá ku konstrukshon di 382 kilometer di muraya na California, Arizona, New México i Texas.
E 10 leinan suspendé ta inkluí diferente rekisito pa permití kompetensia públiko, algun hustifikashon i resepshon di garantia di kontratistanan promé ku inisiá e obranan.
E sekretario interino di Seguridat Nashonal, Chad Wolf a apelá un lei di 2005 ku ta outoris’é pa suspendé tur lei di konstrukshon di barera na frontera. E sekretarionan bou di presidensia di Trump a dekretá 15 suspenshon i eks presidente George W. Bush a dekretá sinku, pero ta promé biaha ku ta apliká e normanan di kontratashon. Tur e otro dekretonan a suspendé normanan ku ta afektá medio ambiente.
E gobièrnu di Trump a bisa ku e suspenshonnan lo permití konstrukshon di 150 kilometer di muraya e aña aki, kual ta forma parti di e 720 kilometer ku e presidente a primintí na momentu ku el a okupá su puesto. Esaki ta un di su polítikanan interno di mas prinsipal.
