NASHONNAN UNI, AP.- Merka a apstené su mes pa promé biaha den 25 aña di vota pa un resolushon di Nashonnan Uní ku ta kondená e embargo kontra Cuba i kual semper e tabata kontra di dje. E desishon históriko di kambia su voto a sosodé poko despues ku e gobièrnu di presidente Barack Obama a insistí ku e embargo mester keda suspendé komo parti di e normalisashon di e relashonnan entre Washington i La Habana.
E voto di apstenshon probablemente lo enfrentá e atministrashon di Obama ku e kongreso merikano, liderá pa e republikanonan, kendenan ta apoyá e embargo ku su pais a imponé kontra Cuba 55 aña pasá apesar di a restablesé e relashonnan diplomátiko.
Un total di 181 pais di e 193 ku ta forma Asamblea General di Nashonnan Uní a vota na fabor di e resolushon ku ta kondená e embargo kontra e isla. No tabatin voto kontra. Israel tambe a apstené na vota.
E desishonnan di Asamblea General no ta vinkulá ku otro pero ta reflehá e opinion mundial. E resolushon aki, ku ta sosodé kada òktober, a duna bos na Cuba pa denunsiá e embargo internashonalmente.
Despues di e voto den un pènel elektróniko, representantenan di numeroso pais a aploudí e resultadonan.
Cuba i Merka a anunsiá na desèmber 2014 e reanudashon di nan relashonnan diplomátiko despues di mas di 5 dékada di tabata leu for di otro despues di e triunfo di e revolushon kubano. Dia 20 di yüli 2015 a reaktivá formalmente e relashonnan bilateral i a habri bèk e embahadanan.
Durante di su bishita pa Cuba na mart Obama a bisa ku ta ora pa kita e embargo pero kongreso ku ta e organismo ku tin poder di suspendé, a resistí di esaki.
Promé ku e voto ayera, embahador na Nashonnan Uní Samantha Power a anunsiá ku su pais lo apstené.
