BERLIN, AP.- E kansier aleman Angela Merkel a afirmá djárason ku ainda ta posibel pa yega na un solushon pa Brexit, apesar ku no tin sufisiente tempu pa yega na un akuerdo satisfaktorio pa ámbos parti.
Merkel a deklará ku ainda por haña un solushon pa e tema kontroversial promé ku 31 di òktober, e fecha programá pa Gran Bretaña bandoná Union Europeo. E kansier a wòrdu kompañá pa e promé minister britániko Boris Johnson, promé ku nan a tene un kombersashon bilateral na Berlin.
“Kisas ta asta posibel pa haña esaki den e próksimo 30 dianan, dikon no?”, asina Merkel a deklará.
E deklarashonnan di Merkel ta kontradiktorio ku loke a prevalesé entre Gran Bretaña i Union Europeo. UE a deskartá tur intento pa negoshá e akuerdo di Brexit atrobe, kual a wòrdu firmá aña pasá ku Gran Bretaña. Johnson ta afirmá ku e lo saka Gran Bretaña sin un akuerdo for di e bloke. E úniko manera pa aseptá e akuerdo ta pa eliminá e klóusula spesial diseñá pa evitá kontròlnan di duana na frontera ku Irlanda. E premier a agregá ku e klóusula mester wòrdu eliminá i remplasá ku “akuerdonan alternativo” pa regulá komersio na frontera. Johnson no kier ningun kontròl na frontera ku Northern Ireland.
