WILLEMSTAD.- E siudadano Carol Capriles, ta kere ku mester bin un diskushon riba eutanasia na Kòrsou. “Hende mester haña e oportunidat pa muri ku dignidat”, asina sra. Capriles ta bisa relashoná ku e kantidat kresiente di pashènt di kanser ku ta bai laga nos tur siman.
E empresario tabata un di e motornan tras di e eksitoso Walk4Light di Arco Cavent ku a tuma lugá den fin di siman den Stadion Ergilio Hato. Un grupo grandi di siudadano a partisipá na e aktividat pa rekordá víktimanan di kanser i pa rekoudá fondo pa e instituto Arco Cavent ku ta un lugá kaminda pashèntnan por pasa nan dianan den e fase terminal den un ambiente trankil. Churandy Martina e sende e vlam di e aktividat ku un antorcha, kompañá pa un gran kantidat di mucha. Tabatin aktuashon sobresaliente di diferente artista lokal.
E organisashon ta haña supsidio parsialmente so i ta dependé di donashon i aktividatnan pa asina aki por duna e tipo di kuido ku ta dunando. Ta den e kuadro aki sra. Capriles ta mira tambe yen di hende ku ta pasa den un sufrimentu enorme promé ku nan bai sosegá. Ta p’esei komo siudadano e ta kere ku mester bai diskutí eutanasia i riba e konsepto pa hende muri den forma digno.
Eutanasia ta prohibí den nos leinan aki anke tin informashon ku ta praktikando e método aki pa basta aña kaba den forma silensioso. Riba papel ta bisa ku niun hende no por tuma desishon riba bida di un otro persona. Ku eutanasia e persona mes òf su famianan por pidi pa terminá bida di e pashènt pa asina e muri den forma digno. Kontrinkantenan sinembargo ta di opinion ku ta solamente Dios Todopoderoso por tuma bida di un hende sin intervenshon eksterno. Sra. Capriles ta kere ku mester hasi e punto aki unu di diskushon. “Mi ta na fabor pa nos introdusí eutanasia pa lei”, asina e ta bisa den forma enfátiko.
Minister di Salubridat, Suzy Camelia-Römer ta kere ku mester diskutí e tema aki riba término. Pa awor aki tin un gran kantidat di tema ku mester atendé promé. Despues ku kaba ku e temanan aki lo mester tin un diskushon públiko riba kon ta bai atendé e prinsipio di muri ku dignidat. Personalmente e minister ta di akuerdo ku esei, manera el a indiká na diferente okashon.
Den sektor médiko tambe tin moveshon kaminda ta hasiendo e pregunta ki sentido tin pa sigui gasta hopi sèn na pashèntnan ku ya kaba no tin e perspektiva di un bida digno. E preshon ta enorme pa e famianan pero tambe pa loke ta trata e aspektonan finansiero ku ta impaktá e fondonan ku tin disponibel awor aki. Manera kosnan ta pintando, banda di e diskushon riba matrimonio di mesun sekso, pronto lo tin un diskushon profundo riba eutanasia i por sierto tambe riba legalisashon di aborto ku ketu bai no ta reglá den nos leinan. (foto Arco Cavent)
