WASHINGTON, AP.- Eks presidente republikano di Kámara di Representante Newt Gingrich a bisa ku Madonna “mester keda detené” pa bisa e multitut den Marcha di Muhénan na Washington ku el a “pensa hopi biaha pa eksplotá Kas Blanku”.
Den un entrevista den e programa “Fox & Friends”, Gingrich a bisa djaluna ku Madonna ta parti di “un fasismo emergente di iskierda”.
Djadumingu, Madonna a klarifiká ku e tabata purbando di ekspresá ku tin dos manera di rospondé na e elekshon di Donald Trump: ku speransa i ku furia. El a bisa ku lo bini kambio “ku amor”.
Gingrich a bisa ku Madonna a kambia su tono paso awor e ta komprondé ku e ta na riesgo.
Un representante di Madonna no tabata disponibel mesora pa rospondé na komentarionan di Gingrich.
