Cleopa ta atvertí
WILLEMSTAD.- Mi por bisa ku Kòrsou tin na e momentunan aki algun desaroyo, pero no ku e desaroyonan aki a eliminá e tenshonnan sosial den komunidat. E tenshonnan aki a keda meskos òf kisas asta a bira pió, i mester paga tinu pa esaki no eksplotá den nos kara. Asina èks parlamentario pa partido MAN, Eugene Cleopa, ta trese dilanti den e Podcast ‘3’or ku Gino’.
Cleopa tin 2 aña ku e no ta aktivo i durante e tempu aki el a evaluá pa su mes tur loke el a hasi pa un kantidat di tempu largu komo polítiko i si e ta kontentu ku e manera kon el a sirbi komunidat. Tambe el a evaluá for di otro ángulo ménos emoshonal. “Un ángulo pa evaluá tur kos riba nan mérito.”
A base di esaki Cleopa ta konkluí ku su interes defakto no a kambia kompará ku tempu e tabata un representante di pueblo, esta, ku mester wak e interes general di pais. E ta mustra ku te ainda tin hende ta aserká su persona pa ayudo sosial. E diferensia ta ku e grupo di hende aki a krese, miéntras ku último añanan Kòrsou a konosé kresementu ekonómiko grandi debí na kresementu di turismo.
“Si ta papia di desaroyo ekonómiko di Kòrsou, e grupo aki tambe mester a benefisiá di e desaroyo akí”, Cleopa ta bisa. Esaki ta but’é yega na e konklushon ku e kresementu ekonómiko ta for di balansa. Miéntras ku riba papel ta registrá kresementu, e realidat sosial den komunidat ta duna un otro bista, e èks parlamentario ta bisa.
“Si nos no paga tinu, e preshon sosial akí ta sigui oumentá i eksplotá den nos kara kaminda e poblashon ta bai rebeldiá kontra e sektor turístiko. Ta algu ku por mira sosodé na otro paisnan tambe”, Cleopa ta atvertí. E ta indiká ku miéntras a registrá kresementu ekonómiko, tin otro rapòrtnan ta indiká ku e problemanan sosial-ekonómiko di pais tambe a krese.
“Hendenan tin hopi debe. E grupo ku ta biba bou di e nivel mínimo di eksistensia a krese, kosto di bida a subi, pero salarionan no ta bai dilanti.” E ta mustra ku den e sektor turístiko e salarionan ta relativamente abou, trahadónan ta keda para pa largu tempu na e mesun nivel di entrada, miéntras ku e entrada di negoshinan den e sektor akí si ta subi. “Ta e tipo di situashonnan aki ta krea frustrashon bou di siudadanonan.”
Un frustrashon, ku segun Cleopa, ta latente, pero ku por eksplotá si no atendé ku esaki. “Mi ta bisa esaki komo un atvertensia pa komunidat ta konsiente di dje. Mi ta spera ku mi no tin rason, pero mi ta mira ku e preshon sosial ta kresiendo.”
Otro efekto di e kresementu ekonómiko ku no ta manehá manera debe ser, segun Cleopa, ta preis di propiedat inmóbil. E ta ilustrá esaki a base di yunan di tera ku ta den eksterior i ke regresá Kòrsou. E preisnan di kas i di hür ta asina haltu ku práktikamente no ta sobra sèn pa hiba un bida digno.
Cleopa ta boga pa hasi e tópiko aki diskutibel riba plataformanan nashonal manera Parlamento di Kòrsou. “No ta bai pa mustra dede riba niun hende, pero mas bien pa atendé ku e problema i evitá ku e preshon sosial sigui krese i no por kontené esaki ta.”
