WILLEMSTAD.- Un di e desaroyonan mas importante ku Kòrsou mester atendé kuné ta den edukashon. Si tuma nota di e diskushonnan ku a hiba hopi aña den e sektor akí, no ta diskushonnan ophetivo. “Ta diskushonnan ku for di un ángulo di rabia, rasa, idioma, pues no ta diskushonnan ophetivo”, David Dick ta bisa den e programa ‘3or ku Gino’.
E ta spera ku na Kòrsou ta purba di tuma un inisiativa pa haña un ángulo pa sinta papia ku otro. Minister presidente Gilmar Pisas mes ta un persona ku por tuma e inisiativa akí. Ku 13 asiento den Parlamento e tin un poder polítiko bastante fuerte, Dick ta opiná.
“E tuma inisiativa i skohe algun tema fundamentalmente importante, manera enseñansa, refineria i otronan, anto wak si por haña diferente hende sinsero pa hiba kòmbersashon kuné i pone e base riba kua ta sigui desaroyá bai. Mi ta kere ku e persona mas adekuá pa hasié ta minister presidente.” Den esaki Dick ta enfatisá ku e prioridat mester ta Kòrsou i no gruponan di interes ku ke hasi negoshi.
Dick ta kere ku mester tene e kos mas simpel posibel i no bini ku konstrukshonnan kompliká. “Puntonan di salida simpel, kiko ke logra i kon ke kana e trayekto. Ora hendenan skibi estudionan grandi ku hopi palabra riba papel tin biaha ta brua nan ke brua bo.”
Mas aleu e ta mustra ku na Kòrsou tin e tendensia di bai bèk serka e mesun hendenan ku ta hustamente a krea e problema pasobra nan tin un sierto interes. Ta e patronchi akí Dick ta bisa ku mester kibra. “Mas di mesun kos, ta mesun resultado ta sigui krea.”
Dick ta indiká ku e sa tin kontakto ku sierto polítiko, pero den e kòmbersashonnan ku e ta hiba e ta ripará ku no tin un filosofia di gobernashon. “Sin un filosofia no tin un direkshon ku ke bai aden. Ta pensa riba aworakí i kon ta haña voto, no ta pensa riba término mas largu.”
Dick na mes momento ta rekonosé ku poblashon tambe den hopi kaso ke mira resultado riba término kòrtiku. “P’esei e ta rekerí madures pa hiba diskushonnan ophetivo na bienestar di Kòrsou. Un pueblo ku no ta madurá, ta oportunista. Ta ora bo ta sòru pa bo próhimo, bo ta madurá.”
Ta esaki tambe ta e problemanan, segun Dick, ku ta mira den edukashon. “Den pasado religion tabata sòru pa sierto balornan den sosiedat manera stima bo próhimo manera bo ta stima bo mes. Pero entretantu ta birando hopi oportunista i ta bringa otro.”
Dick ta konvensí ku Pisas tin un oportunidat grandi pa logra trese kambio den e situashon akí. “Mi no ta rekomendá pa e buska e konsùltentnan di semper ku ta kobra 20, 30 i 40 mil florin pa luna pa skibi plannan p’é. Ban hasi kos bon i gana voto ku e kosnan bon ku ta hasi.”
