WILLEMSTAD. – Habitantenan ta teme pa no mester sosodé un aksidente di tráfiko serio i ku ta di lamentá riba e kaya “Weg naar Wespunt” ku ta pasa den Lagun, dilanti e wikènthùisnan kantu di awa.
Un kaya ku un tempu tráfiko no por a move ku velosidat haltu, pa motibu di e kondishon ku e kaya tabata aden. Tabata un kaya ku hopi buraku i tráfiko mester a move hopi lento.
Despues di un tremendo trabou di asfaltamentu di e kaya i awor tin un kaya lizu lizu, te ainda sin buraku, awor tráfiko ta pasa ku velosidat haltu i te asta tin outomobilistanan ku ta pasa otro outo riba e kaya akí. Pues un situashon sumamente peligroso, pa motibu ku tin otro kayanan ku ta sali riba e kaya.
E peliger ta ku tin vários wikènthùis riba e kaya, ku muchanan por subi kaya i tin hopi turista ta kana na pia bai Playa Lagun òf Jeremí.
Ta bon pa pone drèmpel riba e kaya akí pa baha e velosidat promé ku mester lamentá.
