WILLEMSTAD.- Ayudo di parti di gobièrnu na su siudadanonan tin kaminda ta nesesario. Pero ayudo mester ta un brùg pa desaroyo, no un destino permanente. No por yuda hende pa nan keda dependiente di e sistema, sino ku ta yuda hende pa nan por sali for di dependensia, haña nan propio outonomia i sigui nan kaminda ku dignidat. Un diálogo tripartit ta importante, pasobra e ta duna e espasio pa no papia solamente tokante otro, sino pa papia ku otro. Asina Minister di SOAW, sra. Charetti America-Francisca, a trese dilanti na apertura di e kumbre laboral organisá pa VBC e siman akí.
El a sigui bisa ku, empresarionan ta pidi proseduranan mas kla i mas lihé. Trahadónan ta pidi pa oportunidat ta mas aksesibel. I Gobièrnu tin e deber di organisá e sistema di tal manera ku e ta sirbi tur dos ku efisiensia, transparensia i ekselensia. Pero un di e prosesonan ku mester bira mas efisiente ta e verifikashon si tin trahadó disponibel lokalmente pa yena un vakatura. E kontròl akí ta importante pa protehá oportunidat pa hende ku ta biba na Kòrsou. Pero e no mester bira un proseso lento, burokrátiko òf repetitivo ku ta pone empresa pèrdè tempu i ta laga vakatura keda habrí sin nesesidat. Su aspirashon ta pa e informashon di demanda i oferta di trabou ta aktualisá, i digitalisá, pa por hasi e evaluashon mas lihé i mas eksakto. Asina nos ta protehá e trahadó lokal i na mes momentu, nos ta duna empresarionan e klaridat ku nan mester pa planifiká, invertí i krese.
Den e mesun liña, segun e mandatario, e ta mira un futuro kaminda Sentro pa Trabou no ta solamente un lugá físiko kaminda hende ta bai entregá papel. E mester bira un sentro interaktivo i digital di e tempu ku nos ta biba aden. Un plataforma kaminda trahadó por presentá su perfil, su eksperensia i su sertifikashonnan; kaminda dunadó di trabou por publiká vakatura i haña kandidatonan adekuá; i kaminda gobièrnu por fasilitá, konektá i monitoriá e merkado laboral den tempu real. Un plataforma kaminda un hóben ku ta buskando su promé oportunidat por mira kua formashon e mester sigui. Kaminda un trahadó por sigui desaroyá su kapasidat i kaminda un empresario por haña e talento ku su empresa mester. Digitalisashon no ta un meta riba su mes. E ta un instrumento pa mas efisiensia, mas transparensia i mas hustisia.
‘Fast track’ no por nifiká trato preferensial. E mester nifiká ku un kaso ku ta kumpli ku tur kondishon no ta keda pará den e mesun fila ku un kaso inkompleto òf kompleho. Asina nos ta premia kumplimentu, ta mantené kontròl i ta permití nos ekonomia respondé mas lihé kaminda tin un nesesidat real.
