Mayornan i famianan dilanti di korte ilustrando nòmber di víktimanan
LOS ANGELES, MERKA, AFP.- Un hurado di Los Angeles a determiná djárason ku Meta i Youtube ta responsabel pa kousa daño na un menor di edat. Debí na e diseño adiktivo di e plataformanan, korte a eksihí pa e kompanianan paga 6 mion dòler na daño, inkluyendo 3 mion pa otro dañonan ku ta bin aserka.
E veredikto ta sirbi komo un bentaha importante pa míles di kaso pendiente. Aparte di esaki e ta un señal ku huradonan ta dispuesto na tene empresanan riba retnan sosial responsabel pa e impakto riba salú mental di e usuario, kousá pa desishonnan di diseño.
Hurado a determiná ku ámbos empresa tabata negligente ku nan diseño i funshonamentu di nan plataformanan. E negligensianan aki tabata un faktor importante den e daño ku e demandante a sufri.
Aparte di esaki, e huradonan a konkluí ku ámbos empresa tabata sa, òf mester tabata sa ku nan servisionan ta representá un peliger pa menornan di edat. No tabatin un atvertensia adekuá pa usuarionan riba e riesgo aki.
Ámbos empresa a bisa ku nan lo apelá e veredikto.
Un bosero di Meta a bisa ku nan “no ta di akuerdo ku e veredikto”, i a añadí ku “e salú mental di adolesentenan ta hopi kompliká i ku no por vinkulá esaki ku solamente un aplikashon.
