Méxicanonan den marcha di “Protesta pa Pas” ayera den Culiacán, estado di Sinaloa. Nan ta roga pa pas despues di dos aña di hopi violensia den e siudat.
CULIACAN, Mexico (AFP).- Míles di persona a marcha ayera den e estado méxicano di Sinaloa pa eksigí fin dje guera ku a kuminsá dos aña pasá entre gruponan dje poderoso grupo di narkotráfiko fundá den e region ei. “Luto”, “tragedia” i “doló” ta e palabranan ku kua e manifestantenan a deskribí e ola di violensia ku a surgi den 2024 debí na e traishon entre dos lider di “Cartél de Sinaloa” i ku a laga mas ku 3.000 asesinato.
Iglesia katóliko, empresanan i famianan di personanan ku a disparsé a konvoká e protesta. Bistí na blanku, e partisipantenan a reuní na e tèmpel di La Lomita, den e siudat di Culiacán, kapital estatal, i despues di a lansa blasnan blanku a dirigí nan mes na e katedral. “Nos no ke mas dje mortonan ei, mas asesinato”, segun Maricela Perez (62) a bisa yorando. El a partisipá na e marcha ku un potrèt di su yu Miguel, ku nan a tira mata den luna di mei último riba un kancha di vòlibòl.
E meta dje protesta ta pa outoridatnan “mira ku nos nashon ta agonisando. E ta den un baño di sanger”, segun un di esnan ku a tuma parti na e marcha.
Promé ku nan a kuminsá kana, e obispu di Culiacán, Jesus José Herrera, a hasi un yamada riba delinkuentenan pa stòp ku violensia. “Bosnan stòp, mira e lokual ta pasando, mira e famianan heridá. “Ningun teritorio i ningun ambishon ta bal mas ku bida humano”, segun el a bisa.
E guera ku a start den Cartél de Sinaloa, señalá komo “organisashon terorista strañero” di parti di Washington a kuminsá ku e sekuestro di Ismael “E Mayo” Zambada na mannan di Joaquin Guzmám Lopez, yu di “El Chapo” Guzman. Guzman Lopez a sekuestrá i a hiba “El Mayo” Merka.
Aktualmente “El Chapo” i Zambada, ko-fundadónan di Cartél de Sinaloa, ta kumpli kadena perpetuo na Merka miéntras ku nan herederonan ta disputá e kòntròl dje grupo kriminal.
