CLAUDIA SHEINBAUM; presidente mehikano
CIUDAD DE MEXICO (AFP).- E gobièrnu dje presidente mehikano Claudia Sheinbaum, lo manda pa Kongreso, kaminda e tin un mayoria, un proposishon pa kambio di lei di elekshon pa deskartá relashon ku narkotrafikantenan. E meta ta pa esaki ta un lei pa elekshonnan di 2027, den kua lo renobá e poder legislativo i parti di gobernashon i alkaldenan. “Nos a eksperensiá algun kaso di relashon entre algun presidente munisipal i delinkuensia organisá”, segun Sheinbaum a bisa den konferensia di prensa.
Outoridatnan a anunsiá e detenshon di seis polítiko lokal pa sospecho di ekstorshon i relashon ku krímen organisá. Ya tin 70 di nan detené kuminsando den 2024. Gobièrnu, sin embargo, ta bou di preshon di Merka pa arestá i ekstraditá e gobernador Ruben Rocha, kende nan ta relashoná ku e grupo di trafikantenan di Sinaloa , konsiderá hopi peligroso i fundá pa Joaquin “el Chapo” Guzman. Rocha a pidi lisensia pa apartá su mes dje funshon.
Sheinbaum a pidi pruebanan na Departamento di Hustisia di Merka promé di por aktua kontra dje funshonario. “No ta enkubrí ningun hende, na momento ku tin prueba ta bai den proseso”, segun e mandatario.
E proposishon elektoral ta inkluí awor e kreashon di un komishon, dependiente di outoridatnan elektoral, ku ta investigá huntu ku ministerio públiko si un aspirante tin relashon ku krímen organisá. E akshon aki lo no ta obligatorio pa partidonan polítiko, ku por entregá na outoridatnan di seguridat i inteligensia di hustisia e nòmbernan di nan kandidatonan pa deskartá kualke “riesgo rasonabel di relashon ku delinkuensia organisá”, segun Luisa Maria Alkalde, konsultor hurídiko di Sheinbaum.
.
