MEXICO, AP.- Hopi ta esnan na México ku ta bai hospital buskando nan ser kerí un dia despues di un seri di eksploshon na e merkado i bende klapchi mas konosí ma México. E aksidente aki a laga un saldo di 32 morto i masha hopi persona heridá miéntras ku tur atenshon ta riba un deskuido di seguridat na e lugá. Pa algun hende e último lugá ku nan ke bai buska ta na kas mortuario. E sekretario di estado di Salú di México, Oscar Gomez Monge a bisa ku tin mas víktima ku a fayesé djárason na hospital kual ta oumentá e kantidat di morto i 46 persona ku ta heridá ta kedando den hospital. De esnan ku ta heridá 10 ta mucha inkluyendo un mucha muhé ku 90% di su kurpa ta kimá. For di momentu di e aksidente a tuma lugá, famianan a yega kas mortuario buskando nan ser kerí i hopi biaha no por a duna informashon debí ku tin di e víktimanan ta dje hopi kimá ku no por identifiká nan ku no ta solamente via pruebanan genétiko. E estado di San Pablito den e komunidat di Tultepec ta surtí ku klapchi pa dianan di fiesta.
Masha hopi kumpradó tabata na momentu ku benta a kuminsá i den algun minüt tur kos a keda shinishi i loke tabata di metal a keda intakto. Hopi ta esnan ku tin lokal di benta riba e merkado ku a kritiká e medidanan di seguridat i no mester a permití ku ta kologá rakètnan den e gang pero tòg e bendedónan tabata hasié. Outoridatnan a duna di konosé ku ta hopi trempan pa por duna kiko tabata e kousa di e eksploshon. Un siman promé ku e eksploshon gobièrnu munisipal di e pueblo San Pablito a bisa den un komunikado ku seguridat di e merkado ta esun di mas mihó den e region. Den e mesun komunikado German Gamicia Cortes kende ta presidente di e merkado a sigurá ku e merkado ta konta ku aparatonan di paga kandela, awa, santu, piki, skòp i personal kalifiká ku sa kon pa aktua den kaso di insidente. Pero en realidat kosnan tabata otro kaminda vlamnan a destruí e merkado pa di tres biaha for di 2005.
