WILLEMSTAD.- Frakshon Movementu Futuro Kòrsou (MFK) den Parlamento ta konstatá ku den áreanan históriko manera Punda, Otrabanda, Pietermaai i besindario, tin edifisionan ku ta den un estado hopi deplorabel. “E situashon aki no ta solamente un problema estétiko, pero por krea peliger real pa seguridat di hende ku ta biba, traha òf bishitá e áreanan aki diariamente. Degradashon struktural, riesgo ku parti di e edifisio por kai i falta di mantenshon ta forma un kombinashon ku no por ignorá”, e frakshon ta indiká den un karta dirigí pa presidente di Parlamento, Fergino Brownbill.
Den e kuadro aki e frakshon ta hasi un petishon konforme artíkulo 33 di Reglamento di Órden pa deliberá riba e tópiko “edifisionan históriko den nos sentro di siudat ku ta den estado deplorabel i por trese riesgo serio pa seguridat públiko”. E petishon ta firmá pa lider di frakshon David Seferina, Frenciss Lourens i Juniel Carolina. Ta pidi pa invitá pa minister di Tráfiko, Transporte i Planifikashon Urbano, Charles Cooper i representantenan di “Stichting Monumentenzorg”i “Stadsherstel”NV, pa ta presente pa asina Parlamento por debatí i risibí informashon relashoná ku e situashon ariba menshoná.
Na mes momento e frakshon ta bisa di ta rekonosé ku tin ehèmpelnan positivo di restourashon di edifisionan i tambe di e maneho urbano, ku ta mustra ku ta posibel pa preservá nos herensianan kultural i fortalesé e imágen di sentro di siudat komo un lugá bibu, sigur i atraktivo.
