Diferente yu di Kòrsou ta representá nos pais dignamente i ta alsa e nòmber di Kòrsou sin ku nos ta konsiente di dje. Den nos Djasabra awe nos tin Harvey Hinds, e ta rèfri di ‘waterpolo’ i kaminda e tei komo rèfri, su nòmber ta aparesé komo rèfri di Kòrsou. Harvey Hinds ta biba aktualmente na Hulanda. El a kaba di bin di Israel asistiendo komo rèfri di ‘waterpolo’ i awor e ta rumbo pa Barranquilla, tambe komo rèfri di ‘waterpolo’. Harvey ta bin di un famia di kuater ruman hòmber. Tur tabata landa. Nan mayornan a kana ku nan tur momentu den nan entrenamentu.

Skohe den sali òf landa

Harvey a konta Djasabra  ku e ta e di dos ruman hòmber. Su ruman mas grandi tabata landa kaba ora Harvey a nase. Komo e tabata landa kaba, nan mama a disidí ku nan tin di bai landa tambe. El a kuminsá landa na Rif/Pisina Benny Leito den awa salu. Despues ku el a haña diploma B, el a keda landa i a drenta e tim di Sitoc huntu ku e otro ruman. Pa hopi aña nan a keda den e tim di Sitoc. Despues ku a renová e pisina e ta kòrda ku nan a pasa over pa landa den awa ku glor. Harvey no ta konsiderá e natashon ku e tabata tuma parti na dje unu Internashonal. Nan tur 4 ruman hòmber tabata landa. Ora Harvey a kaba HAVO i a bai sigui studia na Hulanda, einan el a hañ’e den e dilema di landa òf sali keiru. E tabata duda kiko pa hasi. Dado momentu el a disidí ku natashon no ta duna asina tantu sèn, pero e mester traha tòg. Despues di su estudio el a bai traha pa e por kria su mes. Despues di un temporada Harvey a haña salimentu ta mas importante ku landamentu.

 

Rèfri internashonal di ‘waterpolo’

Harvey na man drechi

Einan el a kambia pa ‘waterpolo’, ounke e no tabata malu den dje pero a bai finalmente pa rèfri di ‘waterpolo’ na Hulanda. Na Hulanda nan tin un regla masha importante i esei ta ku promé ku 30 aña bo tin di bira internashonal. Den su kaso ora el a kuminsá e tabatin 32 aña kaba i e no por a bira pa Hulanda rèfri internashonal mas. Dado momento el a topa un persona ku a trese desaroyonan di ‘waterpolo’ na Kòrsou tambe i den kombersashon el a haña e oportunidat di bida rèfri internashonal. Despues di algun aña Harvey a bai riba ‘Fina International Free list’. Pa Harvey esaki tabata un bon oportunidat i ta den e kuadro aki e tabata resientemente na Israel kaminda el a representá Kòrsou komo rèfri neutral den kampeonato mundial di junior di hende muhé bou di 20 aña. I awor aki e ta bayendo Barranquilla Colombia tambe komo rèfri di ‘waterpolo’. Den un kompetensia di vários pais grandi.

Na momentu ku e representá Kòrsou den eksterior, esaki ta algu inkreibel. E ta sintié masha orguyoso ku e ta para atrobe representando nòmber di Kòrsou. El a representá Kòrsou den sentro amerikano i ora bo ta para riba ‘startblok’ i nan yama bo nòmber, bo ta sinti e emoshon ei. I awor aki ora e ta para i e tende su nòmber i tende ku e ta di Kòrsou, e sonrisa ta bin mesora riba su kara. E úniko kos ku e falta ta e himno nashonal ku esei si no ta toke pe einan. “mi ta sintí mi hopi orguyoso ora nan yama mi nòmber i di Kòrsou”.

 

Landamentu no ta trese sèn

Harvey a bisa Djasabra ku landamentu no ta trese sèn. Na Hulanda aktualmente tin algun evento ku por partisipá na dje pa por gana sèn. Pero bo mester ta hopi bon pa e generá entrada. Esun ku no ta hopi bon den e natashon no ta haña entrada. Harvey no a haña chèns di bai Olimpiada. Su tempu tabata bon pero no asina bon pa partisipá na Olimpiada. I na Olimpiada bo tin di gana algu promé ku bo hasi e natashon profeshonal.

 

Deporte tur momentu

Nan tata ta den baseball, pero e yunan a bai den direkshon di landamentu. Harvey a bisa ku su mayornan no a pusha nan den deporte pero tabata ke pa nan hasi deporte. Nan por a landa òf den su kaso i Howard tabata hunga básketbòl i beisbòl. Tur momentu nan tabata beisig ku un ke otro deporte. Nan no tabata muchanan ku ta djis sinta wak televishon òf hunga wega riba kòmpiuter. Nan ta move hopi den deporte.

 

Deporte den grupo i no individual

Masha sinsero Harvey a bisa nos ku si e tin di skohe awor aki pa un deporte, e lo no skohe landamentu. Esaki pasobra e tin 2 yu muhé awor aki i el a bisa nan ku e ta gusta landamentu pero landamentu ta un deporte ku ta pa individuo. Ta bo so tin di hasié. E no ta algu di tim i bo no tin hopi amigu ku ta hasié. No ta hasi e deporte di landamentu den grupo. I esei ta algu ku Harvey a sinti hopi falta di dje. I p’esei awor e ta bisa su yunan ku e ke pa nan haña e deporte di ta den grupo, huntu den un tim. I nan tin di hasi algu ku e tim ei pa gana. Su yunan ta haña esei straño pasobra nan ke sa dikon no por hasi un deporte di individuo. E ta kere ku bo por hasi un deporte di individual pero hasi unu di grupo tambe.

 

Disiplina tur ora

Den landamentu bo ta guia un hóben i tòg ora e hasi 18 aña e ta bai studia i bo ta pèrdè. I esei ta e kos; e disiplina manera e i su ruman tabatin, nan a sigui landa ora nan a bai afó pero despues di 15 aña ta landa e ke wak otro kos . Esei ta pasando tur kaminda. Si bo ta landa i bo no yega tòg, no tin otro kos pa bo bai hasi. Bo mester keda konsentrá i e disiplina mester keda pa bo bai dilanti.

 

Kòrsou  mester haña nominashon olímpiko

Kòrsou ta kresiendo drástikamente den deporte. Hopi hóben ta hasiendo deporte den grandi den eksterior. Harvey ta haña e desaroyo aki ta bayendo hopi bon. Loke e no ta haña ta pasando hopi bon ta ku Kòrsou no tin e nominashon olímpiko ainda. Nos tin di laga nos muchanan i nos hendenan representá nos bou di bandera di Hulanda. Esei Harvey no ta haña esei bon. E lo tin gana pa Kòrsou komo pais, nos hendenan representá nos mes ku nos bandera. Tur ora ku e wak beisbòl i futbòl e ta wak hendenan ku bo ta tende hopi aña kaba di nan pero nan no ta representá nos pais, nan ta representá Hulanda por ehèmpel. I esei Harvey no ta haña un bon desaroyo.

 

Den infrastruktura na Amsterdam

Harvey aktualmente ta traha pa Infrastruktura di Amsterdam. Tin un pida di Amsterdam na su enkargo ku e tin di sòru pa e parti di kaminda, sòru pa tur kos ta na òrdu, sòru pa tur kos ta bon den e espasio públiko. Esaki ta for di asfalt te na e stupinan ku ta kana ariba. E ta sòru pa kaminda hende tin di kana ta bon i sin ku hende ta trompeká i pa outonan no haña daño dor di kaminda malu.

 

Yuda na desaroyo di Kòrsou

Gilad Kavalerchik www.Giladka.com

Harvey ke aportá mas na su pais. Pero el a bisa esaki ta poko difísil pasobra e tin di tene kuenta ku hopi kos. E tin famia na Hulanda i konstantemente e ta den eksterior komo rèfri. I tòg mei mei e ta hinka un fakansi ku su famia i na mes momentu e ke yuda den  desaroyo di Kòrsou. Harvey a bisa ku ora e tin mas tempu e eksperensia ku e ta hañando awor aki e ke us’e pa yuda Kòrsou. Kisas duna lès òf siña otronan pa tambe bira un bon rèfri.

 

Esnan robes hopi bia ta riba e promé liña

Harvey tambe ta konsiente ku tin hopi yu di Kòrsou den eksterior hasiendo masha bon trabou. Lamentablemente mayoria bia ta esnan den kaminda robes ta tende di dje. Esnan bon no ta para na promé rei i no ta bati riba pechu ku nan ta yu di Kòrsou pasobra pa nan ta e trabou ta importante. I den su kaso e por bisa ku e ta hasi su trabou i ora e ta representá Kòrsou e ta sòru di hasié bon.

 

Tene kurpa den kondishon

Gilad Kavalerchik www.Giladka.com

Harvey aktualmente ta hungando hockey pa e por tene su mes den kondishon. E ta tene su mes aktivo di e forma ei. Tambe e ta kore baiskel hopi i asina tene su kurpa bei. Komo e tabata trein asina tantu den natashon, el a tene un rùst un ratu pero e mester a kuminsá bèk ku algu di deporte pa e por keda den kondishon.

LAGA UN KOMENTARIO

Please enter your comment!
Please enter your name here