kon pa hasi nan negoshi sostenibel.
WILLEMSTAD.- Djaweps atardi Mi NEGOSHI Shared & Support Services (MSSS) a organisá un seshon di treinen gratuito titulá “Forge Dreams into Legacies”, pues konbertí bo soño den un legado. E treinen a keda duná dor di Eugene Maduro, un empresario sostenibel, ku a gana vários premionan empresarial.
E treinen aki ta forma parti di e kompromiso kontinuo di Mi NEGOSHI pa no solamente ekipá e empresarionan lokal ku diferente hèrmèntnan práktiko, pero tambe inspirá empresarionan ku kambionan di mentalidat pa asina krea negoshinan ku tin balor i ku ta duradero.
E punto sentral di e treinen aki tabata “sostenibilidat ta kuminsá di paden”. Ku esaki MSSS kier a siña e empresarionan ku ta importante pa pone prioridat riba bienestar pèrsonal, konsientisashon sosial, responsabilidat ambiental i un base empresarial sólido.
Durante e treinen, Eugene Maduro a enfatisá ku sostenibilidat ta un práktika ku ta sostené nos ekologia, humanidat i naturalmente nos ekonomia. E la enfoká riba e 4 pilánan importante di sostenibilidat, splikando ku e legado real pa konstruí un negoshi ta rekerí, disiplina, propósito i akshon òf kurashi manera e la yam’é. Esakinan ta klave pa un éksito duradero.
E tipo di treinen aki ta aliniá ku e mishon di Mi NEGOSHI Shared & Support Services, pues pa sostené empresarionan lokal dor di inspirashon, motivashon, inovashon i yuda krea fundeshinan empresarial sólido pa asina kada empresario por logra éksito ku nan negoshi. Dor di invertí den desaroyo sostenibel riba tur nivel, esta pèrsonal i profeshonal, MSSS ta yuda empresarionan pa prepará nan mes pa un negoshi duradero.
E treinen no tabata simplemente un treinen, si no un “call to action”. Un Yamada pa tuma akshon. For di e treinen aki e empresario a sali ku un konosementu mas profundo ku sostenibilidat no ta solamente ta mas bèrdè, pero e ta algu muchu mas fundamental.
Ta bai tin mas tipo di treinen nan asin’aki, ku (futuro) empresarionan por partisipá.
Semper por konektá ku MSSS riba retnan sosial pa asina haña mas informashon i programanan gratuito pa empresarionan ku kier nan negoshi dura.
